O pasado 12 de abril, Emilio Pérez Touriño presentaba a súa propia páxina web para achegar apoios de cara ás futuras eleccións autonómicas, pretendendo emular a campaña de imaxe de Rodríguez Zapatero co seu Zapatero Presidente, aínda que topou cun tal Anónimo Bermúdez que xa rexistrara o dominio de Internet tourinopresidente.com, polo que o espazo virtual do líder do PSdeG tivo que ser presidentetourino.com (a falta de eñe nos nomes de dominio tamén fai pouco afortunada a elección).

As fotografías tomadas dende satélite sempre tiveron utilidades prácticas, aínda que as únicas coas que estabamos familiarizados eran as do Meteosat, que axudan a realizar as predicións meteorolóxicas, polo que ver a Terra dende o espazo parecía algo que só podían facer uns poucos afortunados, pero nos últimos anos a cousa cambiou moito e distintas compañías comezaron a cartografar todo o mundo incorporando mapas topográficos, imaxes de satélite e fotos aéreas tomadas mediante avionetas.