Repsol YPF

O ferro é imprescindible para o noso organismo. Grazas a el, mantéñense os niveis necesarios de hemoglobina nos glóbulos vermellos, responsable de transportar o osíxeno a todas as células do corpo. Un déficit deste mineral produce anemia, un problema maioritariamente feminino, xa que un 20% dos casos dáse nas mulleres, fronte a tan só un 3% que sucede en homes.

Os máis afectados

Se na túa familia hai nenos, ten especial coidado. Estes precisan maiores cantidades de ferro porque se atopan en etapa de crecemento e gastan máis enerxía. Os máis deportistas da casa precisarán tamén unha achega extra polo desgaste físico. Se hai algún vexetariano, presta especial coidado coa súa alimentación, xa que se trata de persoas que non acostuman comer carne, un dos principais portadores de ferro. 

Porén, as maiores afectadas seguen a ser as mulleres. Entre elas, as embarazadas ou lactantes son o colectivo máis débil, xa que precisan máis nutrientes para o desenvolvemento do seu bebé. En xeral, todas son máis propensas á perda de ferro debido á menstruación, sobre todo, se é abundante e prolongada. A consecuencia física é a aparición da anemia ferropénica.

A falta de ferro pódese dar tamén por outras causas. Ás veces débese a unha mala absorción dixestiva, como pasa en pacientes celíacos ou que padecen a enfermidade de Crohn. As úlceras e tumores de estómago poden ser outra causa oculta da anemia, especialmente nas persoas maiores. Por iso, é importante acudir ao médico e realizarse análises de sangue para determinar se o nivel de ferro é axeitado e, en caso de non o ser, pescudar cal pode ser la causa. 

Non dubides en te facer unha proba se notas calquera dos síntomas propios da anemia como palidez de pel, fatiga crónica, dores de cabeza, suor excesivo, inapetencia, problemas de soño, concentración ou perda de memoria…O médico dirate se te atopas entre os niveis normais de hemoglobina ou precisas un complemento de ferro.

Coida a alimentación

O alimento que salienta polo seu contido en ferro de fácil absorción é a carne magra, sobre todo a vermella, como pode ser un filete de tenreira ou de porco. As vísceras tamén son moi ricas neste mineral, por iso, o fígado ou a morcilla deben formar parte da túa dieta. As salchichas, ademais de ser un capricho para os máis pequenos, son unha boa opción para a fin de semana. 

Os mariscos son outra fonte férrica interesante. As ameixas son un dos alimentos estrela, pero o seu consumo debe ser moderado xa que conteñen 24 miligramos de ferro por cada 100 gramos. Ten en conta que a dose diaria recomendada é de 8 miligramos en homes e 18 miligramos en mulleres. Un mineral que tamén está presente en mexillóns, gambas, ostras, luras e outras delicias de mar. Para os amantes do peixe, son de bo proveito as sardiñas. 

Os vexetarianos poden atopar a súa dose de ferro, aínda que sempre menor, en legumes como garavanzos, lentellas, soia ou ervellas; ou en verduras como espinacas, alcachofas, brócoli, acelgas ou coles de Bruxelas. Para dar un pouco de consistencia ao menú, engade puré de pataca como nutritivo acompañante. 

Non esquezas tomar todas as mañás cereais integrais e un feixe de froitos secos como améndoas, noces, abelás, pistachos ou pipas de xirasol. Beber un zume de cítricos cargado de vitamina C axudarate a absorber o ferro dos alimentos, por exemplo de laranxa, limón ou pomelo. Evita o café ou o té durante as comidas xa que producen o efecto contrario e bloquean a acción deste mineral. 

Se che encantan os doces, non te prives da sobremesa. Podes darte unha alegría tomando froitas deshidratadas como cirolas, pasas, albaricoques ou dátiles. O chocolate, esa tentación prohibida para a liña, aquí permítese polo seu contido en ferro. Iso si, todo na súa xusta medida. 

Artigos relacionados:

- Plantas inmunoestimulantes

- Homeopatía, a medicina alternativa