Repsol YPF

Os ovos, a carne e o peixe son alimentos ricos en proteínas. Probablemente escoitases en máis dunha ocasión esta afirmación. Pero, sabes que son en realidade as proteínas? Que funcións cumpren? Por que son tan importantes para o noso organismo?

Pois ben, dito dun xeito técnico, as proteínas son moléculas de gran tamaño, compostas por aminoácidos, cuxa falta, sobre todo, dalgún dos nove que se consideran esenciais, pode dar lugar a diferentes tipos de desnutrición. A isto hai que engadir que o corpo non os pode producir por si mesmo, e por isto a súa inxestión é tan importante.

Así por exemplo, as proteínas son as encargadas de subministrar o material necesario para o crecemento, e a reparación de tecidos e órganos do corpo. Por exemplo a queratina está presente na pel, unllas e pelo, mentres que o coláxeno é importante nos ósos, cartilaxes ou tendóns. 

Ademais, forman parte do sistema inmunolóxico do teu corpo, é dicir das túas defensas e son moi importantes nos procesos de coagulación. Se che cortas, son as encargadas de evitar que perdas sangue. O seu consumo axudará no transporte de graxas e osíxeno (hemoglobina), ademais de colaborar na regulación da actividade das células.

Non debes esquecer así mesmo a función enerxética das proteínas, isto é, os aminoácidos poden facer de combustible para o teu corpo, sempre e cando a achega de hidratos de carbono ou graxas sexa insuficiente.  

Cantas proteínas debes tomar?

Desde a Axencia Española de Seguridade Alimentaria e Nutrición lembran que a clave dunha nutrición axeita reside en consumir unha ampla variedade de alimentos na dieta diaria e semanal. Debes ter sempre presente que non existe ningún alimento que conteña todos os nutrientes que precisa o teu organismo. Cada alimento contribúe polo tanto ao bo funcionamento das túas funcións vitais. As proteínas atopan o seu oco aquí, e por isto, para realizar unha dieta sa e equilibrada, deberían achegar en torno ao 12 – 15 por cento de enerxía diaria. 

Non obstante, debes ter en conta tamén, que en función da túa idade e necesidades, o consumo de proteínas variará. Os nenos e adolescentes, dado que se atopan en etapas de crecemento e desenvolvemento, precisarán de maiores cantidades, mentres que se es adulto, o teu consumo de proteínas responderá simplemente ás necesidades de mantemento das túas estruturas corporais.

No caso das mulleres embarazadas ou en período de lactación, estas requirirán dunha maior achega para atender ao desenvolvemento do feto e a formación das proteínas do leite materno, respectivamente. 

Onde están as proteínas?

As proteínas que precisa o teu corpo proceden de alimentos de orixe animal; carnes, ovos, peixes, aves ou produtos lácteos ou froitos secos, soia, legumes ou cereais, no caso das de orixe vexetal. 

O valor biolóxico das proteínas de orixe animal é maior, posto que contan con todos os aminoácidos esenciais que precisa no corpo. Por contra, custarache máis dixerilas que se tomas as que proveñen dos vexetais. Debes ter en conta por outro lado, que a proteína animal acostuma ir acompañada de graxas, na súa maior parte saturadas, e un exceso destas graxas eleva o risco de padecer enfermidades cardiovasculares.

As proteínas vexetais chegarán á totalidade necesaria de aminoácidos esenciais que precisa o teu organismo, se combinas correctamente diferentes vexetais. Así por exemplo, o arroz contén todos os aminoácidos esenciais menos un, a lisina. Se o tomas combinado con legumes –abundantes en lisina–, a calidade biolóxica e achega proteica será superior á da maioría de produtos de orixe animal.

Artigos relacionados:

- Omega 3, aliado da saúde

- Ensínaos a comer ben