Repsol YPF

Son festas nas que se abusa dos embutidos, entrantes graxos, fritos, marisco, queixos, bombóns, mazapáns, turróns e todo tipo de doces. Nestas datas, o corpo chega a triplicar a inxestión de calorías e a resposta do organismo preséntase en forma de dixestións pesadas e acidez. O proceso caracterízase por unha sobreprodución dos ácidos potentes e encimas que facilitan a dixestión e que acaba lesionando as membranas mucosas que recobren o estómago. 

Aínda que estas molestias poden presentarse a calquera idade, o máis frecuente é que afecten a persoas que xa padezan trastornos dixestivos, gastrite ou úlceras hepáticas. Outra consecuencia acostuma ser a inxestión excesiva de azucres, graxas e alcohol, que se acumulan no corpo en forma de toxinas, colesterol e ácido úrico.

A popular “resaca” tamén fai a súa aparición por estas datas, como resultado do exceso de alcohol. Caracterízase por un malestar xeral con dor de cabeza, sequidade na boca e nalgúns casos, náuseas e acidez de estómago. Para recuperarse, o máis axeitado é consumir gran cantidade de auga para previr a deshidratación, repor a perda de vitaminas con zume de laranxa e froitas frescas e tomar alimentos suaves como arroz, consomé ou peixe fervido, moi indicados para repor as sales e o potasio que se perden polo consumo de alcohol. 

Bos propósitos
Concluídas estas datas, o ano comeza cheo de bos propósitos e entre os prioritarios acostuma estar o recuperarse fisicamente dos estragos que causaron as festas. 

Os expertos en nutrición aseguran que os españois terminan as festas cunha media que oscila entre dous e catro quilos de máis. Para recuperar o equilibrio físico débese seguir unha “cura de desintoxicación” e eliminar eses quilos que se acumularon. Este pode ser un bo momento para pensar seriamente en seguir unha alimentación onde se inclúan todos os compoñentes da pirámide nutricional. Non obstante, hai que ter en conta que se debe dar un marxe de tempo ao corpo para volver ao peso perdido e non se obsesionar coa báscula. 

Convén deixar a un lado os alimentos graxos que caracterizaron os últimos días, así como as bebidas gasosas e a cafeína e recuperar precisamente aqueles alimentos que se deixaron de lado durante o Nadal, os que achegan vitaminas, minerais e antioxidantes, isto é,  seguir unha dieta rica en lácteos, verduras e froitas. Hai que establecer un plan de alimentación sensato e non recorrer a dietas milagrosas, porque se pode caer no temido “efecto ioió”. 

Como durante as festas o estómago acostumouse a inxerir grandes cantidades de alimento, non se pode facer unha dieta drástica. Por iso recoméndase tomar alimentos con poucas calorías en grandes proporcións, como ensaladas ou cereais, que proporcionan sensación de saciedade. Unha opción é pórse en mans dun endócrino ou apuntarse  a un curso de cociña natural, onde se ensina a preparar cereais integrais, algas, proteínas vexetais ou sobremesas sen azucre que só empregan produtos naturais. 

Practicar deporte a diario
Aínda que é difícil programar cambios bruscos, recoméndase así mesmo facer un pouco de exercicio diario e atopar unha hora para camiñar xa que a falta de mobilidade é outro dos grandes males que padece a sociedade de hoxe en día. 

Os ximnasios experimentan a principios de ano un considerable aumento de clientes, decididos a pórse en forma practicando spinning, yoga, Pilates, tai-chi, aerobic ou exercicios de musculación. Porén, hai que ser consciente que esta actividade require esforzo e continuidade. 

O descanso e as horas de sono son fundamentais e neste sentido é recomendable reducir a vida social, sobre todo a nocturna, polo menos durante as primeiras semanas para darlle tempo ao corpo para recuperarse. 

Se se é fumador, o comezo dun novo ano acostuma ser unha data indicada para abandonar este hábito definitivamente. 

O problema acostuma ser que, unha vez desintoxicado o organismo, téndese a volver á comida rápida, a alimentación a base de bocadillos e os bolos industriais, unidas a unha vida sedentaria, algo que pode conducir a unha indesexada situación de sobrepeso e incluso de obesidade. Por iso é fundamental a forza de vontade para seguir a liña alimenticia e deportiva trazada. O corpo agradecerao. 

Artigos relacionados:

- Dietas axeitadas ao deporte

- Excesos do nadal Nadal e malas dixestións