Repsol YPF

En España, uns 800.000 españois padecen reaccións alérxicas por picaduras que, en determinados casos, poden chegar incluso á morte. O sangue e a suor do corpo humano conteñen uns compoñentes aromáticos que resultan atractivos para os insectos. 

As moscas acostuman criarse en zonas insalubres onde as larvas se alimentan de materia orgánica en descomposición. Unha vez xa adultas achéganse ata áreas habitadas en busca de alimento e poden ser transmisoras de enfermidades. 

Hai que procurar evitalas, limpando a fondo lugares como a cociña e colocando mosquiteiras nas fiestras. Estas son unha especie de cortinas de aluminio enroscábeis, construídas a medida e cunhas guías adaptábeis a calquera tipo de apertura. No mercado tamén existen uns aparellos eléctricos que se acostuman  ver nos bares e establecementos de alimentación e que fan que os insectos queden electrocutados ao achegarse voando.  

Eliminar criadeiros

Os mosquitos son outra especie molesta e á vez portadora de graves enfermidades. Existen diferentes especies. As que desenvolven a súa vida arredor dos fogares, teñen tendencia a non voar moi lonxe. Acostuman criarse en recipientes de auga estancada, canais e gabias e entran nas casas para alimentarse. 

Convén limpar os canais de auga dos tellados e non deixar que os restos acuosos se acumulen en lugares como o interior de maceteiros, piscinas de plástico para nenos ou os cobertores empregados para protexer grellas ou pilas de leña. Tamén hai que realizar limpezas periódicas nos estanques,  evitar achegarse aos contedores de lixo e procurar non deixar ao aire libre os tazóns de auga dos animais de compañía. 

O vinagre e os aceites esenciais de limón ou lavanda diluídos en auga e aplicados sobre a pel, son un eficaz repelente fronte a moscas e mosquitos. Algunhas especies de herbas aromáticas como a alfabaca ou a menta tamén evitan que os insectos entren no fogar, xa que non soportan o olor que desprenden. Para isto, tan só hai que colocala, ben no chan ou plantada en macetas preto de portas e fiestras.  

Outro remedio contra os mosquitos é cocer unhas follas de eucalipto, coalo e botar o líquido en pequenos recipientes e colocalos nas habitacións. Unha solución para nenos é adquirir en tendas naturistas aceite esencial de lavanda, e engadilo a calquera aceite ou crema corporal para aplicalo sobre o corpo. Tamén convén evitar que camiñen descalzos, especialmente en zonas de xardín.

Sen dúbida un dos recursos máis empregados para combater estas pragas estivais son os insecticidas en spray. Hoxe en día teñen un efecto polivalente, xa que dentro de casa, serven para eliminar ás moscas, mosquitos, couzas e arañas e nas zonas de xardín acaban con arañas vermellas, eirugas, pulgóns e formigas, entre outros. 

Á hora de empregalos na casa, débese pulverizar o ambiente e as zonas próximas ao lugar de onde proveñen os insectos e pechar a continuación as habitacións para que faga efecto. Se o problema está no xardín, hai que pulverizar a un medio metro de distancia ou sobre a superficie onde viven os animais, procurando que non estean mollados nin faga sol ou vento. É mellor pulverizar suave e repetidamente. Non convén botalos sobre lugares onde haxa comida exposta, vaporizar ao lume nin deixalos expostos ao sol, xa que son altamente inflamábeis.

Insecticidas eléctricos

Outra modalidade son os insecticidas eléctricos. Constan dun difusor no que se enrosca o recambio, enchúfase á corrente e actúa durante toda a noite, aínda que as estancias permanezan abertas. Para previr os posíbeis esquecementos e deixar o difusor enchufado, existen algúns modelos con temporizador, nos que se especifican as horas de comezo e desconexión. 

Este tipo de insecticida vén a durar un mes, non cheira nin fai ruído, polo que pasa totalmente desapercibido. Pola noite, para escorrentar os mosquitos son especialmente útiles os difusores de insecticidas eléctricos que conteñan permetrina ou tamén se pode queimar espirais espantadoras de insectos.

Ademais das tradicionais mosquiteiras sobre as camas para evitar picaduras pola noite, as locións repelentes de insectos son unha alternativa a ter en conta especialmente no caso de nenos ou se se viaxa ao estranxeiro, xa que os mosquitos en países cálidos e húmidos de determinadas zonas do mundo transmiten enfermidades como o paludismo ou a febre amarela. Convén informarse das vacinas que hai que se pór e preparar unha caixa de primeiros auxilios completa. O repelente máis eficaz contra os mosquitos, é a dietiltoluamida ou DEET. Aplícase tres ou catro veces ao día e forma unha capa gasosa sobre a pel, que a converte nun lugar pouco atractivo para estes insectos. 

O produto repelente débese estender por todas as partes do corpo que vaian estar expostas, incluídas por suposto a cara e o pescozo,  inmediatamente antes da exposición aos mosquitos porque é o olor do produto o que os repele e co paso do tempo vai desaparecendo. Polo xeral, convén volver aplicalo transcorridas unhas oito horas pero se se súa en exceso ou se tomou un baño, convén repetir a aplicación.