Repsol YPF

Os pés son a base sobre a que se sustenta a estrutura ósea do corpo humano. Cos meses estivais chegan as temperaturas altas. Téndese a cubrirse con prendas cómodas, os pés con sandalias e tanto a praia como as piscinas acostuman o punto de encontro habitual de moitas persoas. 

Esta combinación de calor con lugares moi concorridos e en ocasións longas camiñatas poden desembocar nalgúns problemas para os pés como as ampolas, os eccemas, os papilomas, micose e infeccións, xa que están máis descubertos e expostos a contaxio que noutras épocas do ano.

As infeccións por fungos causadas no ser humano divídense en tres grupos, en función da parte do corpo onde aparezan e o seu grao de afectación. Entre as máis frecuentes están as que se orixinan polo uso de calzado deportivo e o mesmo ocorre con ambientes húmidos como piscinas, duchas ou saunas. Nestes lugares é imprescindíbel o uso de calzado porque o mecanismo de contaxio se produce cando unha persoa que padece este problema camiña descalza e vai deixando no solo pequenas esporas de fungos que calquera outra pode pisar e contaxiarse desa forma. 

Importancia da hixiene
Os fungos acostuman aparecer na zona interdixital, isto é, o espazo entre os dedos, polo que se fai especial incidencia na importancia da hixiene e dun correcto secado para evitar a proliferación. 

Para previr o contaxio por fungos, especialmente en lugares públicos convén empregar chancletas ou calcetíns de látex. Se se practica o sendeirismo é recomendábel empregar calzado especial de montaña, con calcetíns de fibras naturais que eviten a suor. En canto ao calzado cotiá, este debe ser cómodo e flexíbel para evitar rozaduras. 

Diariamente débese manter unha correcta hixiene, hidratar profundamente os pés para evitar gretas e feridas e masaxealos. Neste sentido, camiñar pola praia resulta moi beneficioso para fortalecer a musculatura do pé, especialmente nalgunhas patoloxías, e ademais produce un efecto “peeling” que axuda a limar asperezas. Polo contrario, non convén abusar dos baños moi quentes e prolongados porque amolecen a pel e facilitan a penetración dos fungos. 

Os papilomas son outro dos problemas podolóxicos que aumentan en verán. A pel ten varias capas e é na derme, a máis profunda, onde nacen as células que compoñen a pel e onde tamén se acostuman orixinar os papilomas. En principio poden afectar a calquera área do pé, pero o habitual é atopalos en zonas de presión ou de roce, como a planta e, sobre todo, no talón. Os papilomas poden aparecer en ocasións recubertos de callosidade, o que lle fai difícil diagnosticalos a simple vista, xa que se poden confundir cun callo. Resultan dolorosos cando a verruga atópase en zonas de apoio ou presión do pé e doen máis se se beliscan que se se premen. 

Diversos tratamentos
A medida que transcorren os meses aumentan de tamaño e crean unha especie de colonia de papilomas que infecta as zonas próximas. A simple vista amósase como unha callosidade de tamaño variábel, rodeado dun anel máis branco que o resto da lesión. 

Ao igual que sucede cos fungos, para previr o contaxio de papilomas débese evitar camiñar descalzo por duchas colectivas ou piscinas, especialmente se se teñen feridas ou rozaduras nos pés, evitar os calcetíns de fibra sintética así como o calzado que impida a correcta transpiración e que favoreza que os pés estean húmidos, convén cambiarse de calcetíns todos os días e se se súa moito incluso dúas veces ao día e, por suposto, acudir ao podólogo se se aprecian callosidades ou durezas, para que as diferencie de posíbeis papilomas.

Para combatelos, os papilomas trátanse con substancias ácidas que producen unha queimadura na pel e así van eliminando esta lesión. O problema é que acostuman ser tratamentos bastante prolongados. Nos últimos anos impúxose o uso da crioterapia para reducir os papilomas. Consiste en aplicar frío sobre a lesión para provocar a súa conxelación e a conseguinte destrución das células infectadas. En podoloxía úsase con frecuencia o nitróxeno líquido (-196º C). Aplícase directamente sobre o papiloma mediante un algodón somerxido no líquido. Ten unha efectividade maior que outros tratamentos.