Repsol YPF

Ante a necesidade de levar anteollos, son moitas as persoas que se decantan pola opción das lentes de contacto, que supoñen innumerábeis vantaxes, pasan desapercibidas aos ollos de terceiras persoas e permiten desenvolverse con total comodidade. Non obstante, antes de adquirilas, é necesario realizar un estudo personalizado previo onde se toman medidas da córnea (a súa curvatura e o seu diámetro), faise unha exploración para comprobar se existen problemas de sequidade, a calidade das lágrimas etc. e, finalmente, selecciónase o tipo de lente que mellor lle vaia ao paciente.  

Tras elixir a modalidade de lentes que máis se acomodan ás características da persoa, hai que realizar unha serie de probas nas que se ensina como poñelas e quitalas, os coidados que implican, o seu mantemento e a súa hixiene, así como os produtos necesarios para isto. Ao mesmo tempo, vaise acostumando progresivamente o ollo a soportar este corpo estraño que se colocou na súa superficie, ata que chegue un momento en que no se perciba ningunha diferenza.  

Tipos de lentes
····· Á hora de decantarse entre lentes de contacto duras ou brandas, cómpre ter en conta diversos factores, como as propias características do ollo, a graduación que ten o paciente ou o uso que se lle vai dar. Nestes casos, é importante ter en conta a opinión dos profesionais, que mellor poden asesorar á hora de elixir. 

Hoxe en día, as lentes de contacto ríxidas están practicamente en desuso e o máis habitual acostuma ser empregar as semirríxidas ou permeábeis, que permiten unha perfecta osixenación da córnea. Están fabricadas con materiais fáciles de limpar e poden usarse durante longo tempo. O inconveniente é que nun principio resultan molestas, en comparación coas lentes brandas. 

As lentes brandas adáptanse facilmente ao ollo e non se moven, o que facilita a práctica deportiva ou outro tipo de actividades que requiran movementos frecuentes. Ademais, tamén poden ser desbotábeis, coas vantaxes que isto implica en canto á hixiene ocular. Están fabricadas en materiais hidratados que presentan unha gran capacidade de acumular depósitos na súa superficie e é necesario limpalas cada vez que se quitan. Este tipo de lentes ensúciase con moita facilidade e se non se limpan ben, despois pode ser moi difícil eliminar a sucidade depositada. Non se deben limpar con auga porque se altera a hidratación destas lentes e pódense acabar deformando. 

Os ollos son unha parte moi sensíbel do organismo e a hixiene é un aspecto básico á hora de manipular as lentes de contacto. As mans deben estar ben limpas cada vez que se poñen en contacto coas lentes. Para limpalas hai que fregalas entre as xemas dos dedos ou ben contra a palma da man co limpador correspondente, despois enxugalas e finalmente gardalas dentro dos seus compartimentos co líquido adecuado. 

É fundamental facer unha desinfección total das lentes se estas estiveron gardadas e sen ser postas durante un tempo prolongado. Nestes casos, o mellor é acudir a una óptica para que realicen unha limpeza en profundidade. Os estoxos tamén deben limparse con auga e xabón, polo menos unha vez por semana aínda que tamén poden usarse exemplares desbotábeis, que se renovan periodicamente. 

Respectar os horarios
Os especialistas recomendan respectar os horarios, especialmente cando se comeza a levar lentes por primeira vez. Aconséllase dividir o día en dúas partes dunhas 4 a 6 horas cada unha, estabelecendo unha pausa intermedia dunhas 2 horas, na cal se permita que o ollo “descanse” e que as células da córnea se recuperen. 

Non obstante, en moitas ocasións sométense os ollos a prolongados períodos coas lentes postas, co que se fai necesario seguir un control periódico para comprobar que este órgano ocular non se resente. Hai persoas que, polas súas características físicas, poden levar postas as lentes de contacto durante moitas horas seguidas e hai incluso quen dorme con elas, pero non todo o mundo o pode facer. 

Un uso prolongado das lentes de contacto pode carrear que os ollos se poñan encarnados, se teña una sensación de proído e de que no se soportan as lentes nos ollos. Ademais, tamén inflúen outros factores, como os ambientais ou que as lentes non estean limpas.