In Dey nomine, amen. Sepan quantos este publico instrumento de titulo e colaçion vieren como yo Pedro de Soto, bachiller en decretos, prouisor ofiçial e vicario general em lo espiritual e temporal de la santa ygleia, çibdad e arçobispado de Santiago por el muy reuerendo in Christo padre e señor don Alfonso de Fonseca, arçobispo del dicho arçobispado, mi Señor, con potestate beneficia conferendi. acatando la sufiçiençia e onesta vida de vos Jacome Valieyron, clerigo, vos probeo e fago prouision, titulo e colaçion e canonica instituiçion, que sobre vuestra cabeça puse, de la mitad con cura de santa Maria de Morquintian, syto en el dicho arçobispado, que agora esta baco e al presente baco por renunçiaçion ex cabsa promutaçiones , e non alias, que en mis manos fizo del dicho benefiçio don frey Pedro de Aragon, administrador del espital de Santiago, clerigo que fue del dicho benefiçio para que le diesedes e renunçiasedes ex cabsa promutaçiones e non alias el benefiçio de san Biçenço d ' Ouvyña, de que ansy hera clerigo.
|