In Dei nomine amen. Sepan quantos esta carta de aforamiento vieren como yo el liçençiado frai Pedro de Aragon, administrador perpetuo del ospital del Señor Santiago, que soy presente, por el tenor de la presente carta otorgo e conosco que aforo e doy en aforamento e por razon de foro, en nonbre de la dicha casa e ospital a vos Afonso Borneo, morador en la feligresia de Catasoos, que soys presente, e a Mayor Lopez, vuestra muger, que es absente, vien asy como sy fuese presente, conviene a saber que vos aforo e doy en aforamento el casal do Puço, que es en la dicha felegresia de Catasoos, con todas sus casas, casares, herdades, montes e resios, arboles e plantados a montes e a fontes, e con todos los sus derechos e pertenençias, quantas ha e aver deue el dicho lugar, e le pertenesçen e pertenesçer deven en qualquier maneyra e por qualquier titulo e razon que sea, e por tenpo e espacio de vuestras vidas de vos los sobredichos e mays tres vozes, en tal maneira que vos o la dicha vuestra muger, qual de vos mas beuiere, nonbre la primera voz, e la primera la segunda, e la segunda voz la tercera.
|