Guía de apelidos galegos

Xa está dispoñible a Guía de apelidos galegos, coordinada pola investigadora do ILG Ana Boullón e na que tamén traballaron os membros colaboradores do noso centro Gonzalo Navaza, Luz Méndez e Antón Palacio. 

O buscador conta con máis de 6.000 nomes de familia que abranguen aproximadamente o 95% da poboación galega. Ten a intención de facilitar o coñecemento das formas propias e a súa restitución, ofrecendo tanto a forma estándar de cada un dos apelidos coma a non estándar coa equivalencia patrimonial. Ademais, esta ferramenta permite descargar un informe do Seminario de Onomástica da RAG que acredita cal é a forma correcta daqueles nomes que foron alterados. 

Esta nova guía amplía significativamente a de 1.500 apelidos que a RAG publicou en papel e PDF no 2016. O corpus no que se basea é o do Dicionario de apelidos galegos, en que está a traballar o mesmo equipo e que ofrecerá as etimoloxías e as distribucións xeográficas de cada forma, ademais de sinalar a documentación máis antiga.