María Xesús Nogueira Pereira

Nacín en Berres (A Estrada) en 1968 e son profesora contratada doutora no Departamento de Filoloxía Galega. Logo de me licenciar en Filoloxía Hispánica en 1991, e na subsección Galego-Portugués en 1993, iniciei un labor de investigación que decorreu principalmente por dúas vías. Unha delas foi a narrativa de Cunqueiro, tema da miña tese de doutoramento defendida en 2005, que deu lugar ao libro Soñadores e familia. Os personaxes na narrativa de Cunqueiro (2009) e a varios estudos. A outra foi a poesía galega contemporánea, que analicei en traballos de corte tanto panorámico coma monográfico. Dentro desta liña ocupeime tamén da edición de autoras de referencia (Xela Arias, Poesía reunida, 2018) e de voces emerxentes (13. Antoloxía da poesía galega próxima, 2017). Nos anos noventa inicieime tamén no exercicio da crítica literaria, que veño desempeñando desde aquela en diferentes medios.

Nos últimos anos participei en sucesivos proxectos de investigación competitivos de carácter comparatista, dirixidos por Manuela Palacios (na actualidade tamén por María Alonso), que incorporaron os marcos teóricos da ecocrítica, o ecofeminismo, os estudos animais e o posthumanismo. En 2015 asumín a dirección do Centro de Investigación de Procesos e Prácticas Culturais Emerxentes (CIPPCE) e en 2023 a dirección da revista Dorna. Expresión poética galega.