Xaquín Núñez Sabarís

Xaquín Núñez Sabarís é doutor en Filoloxía Hispánica, pola Universidade de Santiago de Compostela, e profesor asociado agregado no Departamento de Estudos Românicos da Universidade do Minho. Pertence ao Centro de Estudos Humanísticos desta universidade e é membro do grupo de investigación en Identidade(s) e Intermedialidades(s). É codirector da revista 2i. Estudos de Identidade e Intermedialidade, publicación con frecuencia de dous números anuais e indexada en bases de datos internacionais de referencia.

A actividade investigadora ten como focos principais o estudo do modernismo, as relacións culturais e literarias ibéricas, con traballos sobre o intercambio teatral entre Galicia e Portugal, as narrativas intermediais e novas narrativas (minificción, fantástico e policial) e as humanidades espaciais. O resultado desta investigación foi divulgado en libros e capítulos de libros e artigos en revistas académicas especializadas e indexadas en bases de datos internacionais. En 2019 obtivo o Premio Ramón Piñeiro de Ensaio co estudo Cartografías da narrativa galega contemporánea (2020).

Ten participado e participa en diversos proxectos de investigación e forma parte do equipo investigador do proxecto Portal da Cultura Impresa en Lingua Galega nos séculos XX e XXI (IP Pablo García Martínez), cunha liña de investigación sobre os mapas e modelos narrativos da ficción galega contemporánea.