Axuda

1. O Tesouro Informatizado da Lingua Galega ofrece dúas modalidades básicas de consulta:

• Consulta por lema, que permite recuperar conxuntamente todas as formas flexivas dunha unidade léxica, así como as súas variantes gráficas ou fonéticas. Deste xeito, a consulta do lema árbore devolverá como resultados todas as ocorrencias das formas singular ou plural da forma canónica árbore e, ademais, as de variantes como arbre, álbore, albre, árbol, etc. e os seus correspondentes plurais. Nesta modalidade de consulta, que é a que aparece activada por defecto, ofrécese como axuda unha listaxe de lemas que se desprega cando o usuario comeza a escribir a forma buscada.
• Consulta por palabra, que permite localizar no corpus as ocorrencias dunha forma flexional ou dunha variante gráfica ou fonética precisa. Así, a consulta da palabra abidueira ofrecerá como resultados unicamente as ocorrencias que se rexistran no corpus desta forma, e non do seu plural (abidueiras) nin de ningunha outra variante (abedoeira, bedueira, bidueira, bidoeira...).

2. Existe tamén unha modalidade de busca avanzada, que permite refinar as operacións introducindo diversas especificacións, como a categoría gramatical da forma buscada, o treito cronolóxico en que se desexa realizar a consulta e, ademais, a existencia dunha determinada palabra ou lema no contexto próximo. Esta última opción resulta especialmente útil cando se desexan localizar dentro do corpus exemplos de unidades pluriverbais, colocacións, etc.

3. Tanto nas dúas modalidades básicas de busca (por lema e por palabra) como na modalidade de busca avanzada, os resultados das consultas son presentados por defecto en orde cronolóxica ascendente (dos rexistros máis antigos aos máis modernos). En todo caso, o usuario pode logo dispoñer estes resultados en orde cronolóxica descendente (dos rexistros máis modernos aos máis antigos) ou ben seguindo unha ordenación alfabética directa (do A ao Z) ou inversa (do Z ao A) das claves con que se designan as obras.

4. Ademais da localización das ocorrencias da forma buscada e do contexto de uso inmediato (que pode ampliarse activando o sinal correspondente), a aplicación ofrece un sinxelo informe acerca dos resultados da consulta, que inclúe o número total de ocorrencias, o número de obras en que estas se rexistran e un gráfico coa súa distribución por treitos cronolóxicos.

5. A aplicación permite tamén descargar nunha táboa os resultados da consulta. Esta descarga está limitada aos 5.000 primeiros rexistros, contados a partir do primeiro rexistro da páxina activa.