Antón Santamarina Fernández

Antón-Luís Santamarina Fernández (A Fonsagrada, 1942) é catedrático de Filoloxía Románica. Foi secretario (1974-1986) e director de Verba (2010-2012); vicepresidente do Consello da Cultura Galega (1992-1997); secretario (1976-1991), director en funcións (1991) e director do ILG (1993-2004). Actualmente é secretario da Comisión de Toponimia da Xunta de Galicia desde 1979 e Académico Numerario da Real Academia Galega desde 1998.

Os seus intereses investigadores abarcan diferentes campos da lingüística galega. No campo da gramática, son relevantes os seus estudos sobre gheada, o verbo, o adverbio e as conxuncións que e ca. A respecto da planificación do corpus, participou na elaboración da normativa ortográfica e morfolóxica segundo as propostas do ILG (Bases 1977) e ILG-RAG (Normas 1982 revisadas en 1995 e 2003); colaborou con M. González nas escollas léxicas para o VOLGA e interesouse pola incorporación das chamadas falas exteriores ao modelo literario galego. En dialectoloxía, codirixiu con C. García o Atlas lingüístico galego (varios volumes publicados e outros de próxima aparición). Tamén se ocupou da situación social da lingua, da historiografía da lingüística galega, da etimoloxía, da didáctica e da onomástica.

O seu campo de traballo máis relevante é a lexicografía. Neste ámbito publicou o Diccionario de diccionarios e actualmente dirixe o TILG. Ademais, está colaborando na redacción do diccionario académico coa axuda deste corpus.