Carme Silva Domínguez

Carme Silva Domínguez (Lugo, 1968) é profesora titular de Filoloxía Galega na Facultade de Humanidades da USC. Durante o seu período de formación estivo vinculada aos proxectos desenvolvidos no ILG por Antón Santamarina primeiro, e por Xavier Varela Barreiro despois. Baixo a dirección deste último investigador desenvolveu a súa tese de doutoramento sobre a evolución da frase nominal con posesivo desde a Idade Media á actualidade. No ámbito da sintaxe interesouse polas mudanzas estruturais que os corpus de lingua galega permiten documentar, con especial interese nos fenómenos de expansión do posesivo cara á frase preposicional, por unha banda, e de estabilización da relación entre artigo e posesivo, pola outra.

Estudosa da dimensión lingüística da inmigración a Galicia, analizou os incipientes modelos formativos en lingua galega para a nova poboación infantil e adulta desenvolvidos durante a primeira década do século XXI. Outras modalidades migratorias das que se ocupou recentemente en canto ás súas repercusións lingüísticas son o retorno diaspórico e a mobilidade académica, ambas relevantes nas universidades galegas a partir da segunda década do século XXI.