Iván Arias Arias

Iván Arias Arias (Palas de Rei, 1998) licenciouse en Linguas e Literaturas Modernas (alemán) pola Universidade de Santiago de Compostela. Realizou as súas prácticas de grao no Servizo de Terminoloxía Galega (TERMIGAL) do Centro Ramón Piñeiro para a Investigación en Humanidades. Despois, estudou o Máster Europeo Erasmus Mundus en Lexicografía na Universidade do Minho (Braga), concluíndo tamén un semestre na Friedrich-Alexander-Universität Erlangen-Nürnberg. Durante o seu máster, realizou dúas estancias de investigación no Instituto de Lingua Alemá (Leibniz-Institut für Deutsche Sprache, Mannheim).

Actualmente, está a traballar na súa tese doutoral na Universidade de Santiago de Compostela baixo a supervisión da profesora Dra. María José Domínguez Vázquez. Para a súa realización, benefíciase dun contrato para bolseiros predoutorais financiado polo Ministerio de Universidades (FPU21/00188). A súa tese, titulada  Deseño e desenvolvemento dun sistema de anotación semántica (semi)automático para corpus alemáns , trata da implementación de aplicacións computacionais mediante métodos estatístico-preditivos para analizar o léxico de varias linguas, especialmente o alemán e o galego.

Ao longo da súa carreira académica, participou en dous proxectos de investigación. O primeiro é un proxecto europeo, LexVoc - Vocabulario de Termos Lexicográficos (financiado por ELEXIS), destinado a traducir ao galego unha serie de termos do campo da metalexicografía (dirixido pola profesora Dra. María José Domínguez Vázquez e coordinado polo profesor Dr. Simon Krek). O segundo é o proxecto  Etiquetador semántico multilingüe automático e sostible (ESMAS-ES+), financiado polo Ministerio de Ciencia e Innovación/Axencia Estatal de Investigación/FEDER "Un xeito de facer Europa" (Proxecto PID2022-137170OB-I00) e coordinado pola profesora Dra. María José Domínguez Vázquez.