Noelia Estévez Rionegro

Profesora permanente laboral do Departamento de Didácticas Aplicadas da Universidade de Santiago de Compostela. Licenciada en Filoloxía Hispánica en 2006, con grao en 2007, e en Filoloxía Románica en 2008; doutora en Lingüística en 2017, con mención internacional e premio extraordinario, pola Universidade de Santiago de Compostela, e Máster en Tecnoloxías da Información e a Comunicación no Ensino e Tratamento de Linguas en 2023 pola UNED.

Participou en diferentes proxectos de investigación de distintas institucións como o Tesouro Informatizado da Lingua Galega, do Instituto da Lingua Galega (2008-2011); o Corpus del Español del Siglo XXI, da Real Academia Española (2012); Bibliografía Informatizada da Lingua Galega (2013-2015) ou Informe Anual de Literatura Galega. Proxecto de Investigación en Literatura Infantil e Xuvenil (2016-2021), do Centro Ramón Piñeiro para a Investigación en Humanidades. Realizou estadías de investigación na Universidade de Coimbra (2014) e na Universidade do Minho (2023), e docentes, na Universitá di Verona (2021). Na actualidade, é membro do grupo de investigación RODA: Razoamento, Discurso e Argumentación (GRC GI-1667).

As súas principais liñas de investigación céntranse na gramática e a análise do discurso en español e galego, a lingüística computacional (bases de datos lexicográficas e corpus lingüísticos) e a didáctica de linguas mediante tecnoloxías. Das súas achegas ao retrato sociolingüístico, dialectal e gramatical da lingua galega, cómpre salientar os estudos arredor de Valdeorras, da súa presenza na poesía de Florencio Delgado Gurriarán e Manuel María e da análise lingüística da fraseoloxía da comarca.