Cursos de verán de lingua e cultura galegas para estranxeiros 2013

Start date:

Thursday, July 4, 2013 - 12:30

Cursos de verán de lingua e cultura galegas para estranxeiros XXVI edición (4-24 xullo 2013)

O fin primordial dos Cursos será darlle ao alumnado a oportunidade de familiarizarse coa lingua galega e coa realidade sociocultural de Galicia. Amais das clases de lingua, están programadas leccións sobre literatura, historia, xeografía, arte etc., de Galicia, así como visitas a lugares de especial interese cultural da cidade.

Dentro dos cursos haberá distintos niveis:

- Nivel elemental, de iniciación á lingua para quen desexe introducirse no seu coñecemento. O alumnado deste nivel distribuirase previsiblemente en dous grupos, segundo o grao de comprensión da lingua, mediante a realización dunha proba de nivel.

- Nivel medio, destinado a quen xa realizou o curso elemental ou que demostre un coñecemento básico do idioma mediante a realización dunha proba de nivel.

- Curso superior de Filoloxía Galega , para quen cursou o nivel medio ou acredite un bo dominio do galego.

ORGANIZAN:
REAL ACADEMIA GALEGA
INSTITUTO DA LINGUA GALEGA (USC)
SECRETARÍA XERAL DE POLÍTICA LINGÜÍSTICA (XUNTA DE GALICIA)

Director: Manuel González González
Secretaria: Ana García García

Sección

Information

The language and the land:

O galego é a lingua propia de Galicia, un territorio situado ao NO da Península Ibérica. Fálase nas catro provincias que compoñen esta comunidade autónoma, así como nos territorios estremeiros das provincias de Asturias, León e Zamora. Dos case 3.000.000 de habitantes, hai máis de 2.000.000 que usan habitualmente o galego, aos que cómpre engadir case 1.000.000 de emigrantes espallados por toda a Europa occidental, os EUA e América do Sur. En Galicia tamén se fala o castelán, lingua que se foi introducindo ao longo da historia, e tivo ao seu favor o carácter oficial e o prestixio social. Na actualidade as dúas linguas son coñecidas pola inmensa maioría da poboación e o galego, lingua maioritaria, atópase en proceso avanzado de normalización

The legal position of Galician:

- O galego é lingua propia de Galicia.

- O galego é lingua oficial na Comunidade Autónoma de Galicia desde 1981, o mesmo ca o castelán.

- Os poderes públicos teñen o deber de favorecer o coñecemento e utilización do galego.

- Toda a cidadanía galega ten o dereito de coñecer e de empregar o galego en todos os ámbitos da vida pública.

- O ensino do galego e do castelán é obrigatorio en todos os centros escolares.

Santiago de Compostela:

Santiago de Compostela é a capital de Galicia, e atópase situada aproximadamente no centro do seu territorio.

O carácter do núcleo urbano de Santiago está marcado polo feito, metade histórico, metade mítico-relixioso, do descubrimento do sartego do Apóstolo Santiago e o culto subseguinte creado ao seu redor.

O monumento por antonomasia da cidade é a súa catedral. De estrutura románica, atópase moi modificada por reformas posteriores, especialmente barrocas e neoclásicas. O Pórtico da Gloria, a fachada das Praterías e a do Obradoiro sobresaen dentro do conxunto, así como as prazas que a rodean.

Na zona antiga da cidade hai outros monumentos importantes: o Pazo de Xelmírez; os mosteiros de San Martiño Pinario e San Paio de Antealtares; os conventos de San Francisco, Santa Clara, A Nosa Señora das Mercedes e San Domingos de Bonaval (con dous museos no seu interior); os colexios de Fonseca e de San Xerome (este último, actual sede do reitoría da Universidade de Santiago de Compostela); e o Hospital Real, hoxe hotel, construído para atención dos peregrinos que acudían a Compostela.

A disposición medieval da zona vella está aínda ben diferenciada da zona moderna, na que se produciu un crecemento incontrolado da cidade.

Santiago está ben comunicada co resto de Galicia, tanto por estrada coma por ferrocarril. As praias máis próximas atópanse a uns trinta minutos en automóbil.

Travel and accommodation:

Santiago de Compostela ten un aeroporto internacional, a dez quilómetros da cidade. Ademais, conta cunha estación de ferrocarril e outra de autobús que comunican a cidade con diferentes puntos de España e Portugal.

Sen ningún compromiso, a Secretaría dos Cursos facilitará unha listaxe de aloxamentos en Santiago a aquel alumnado que a solicite.

Inscription

Inscription:

Poderanse inscribir todas as persoas que o desexen, unicamente se esixe ter cumpridos 18 anos e que a ficha de inscrición e a documentación requirida no caso de petición de bolsa estea na Secretaría dos Cursos antes do 1º de maio.

ficha_inscricion_2013.pdf

Scholarships:

A organización dos Cursos dispón de varias bolsas, por importe de 350 euros cada unha. Os bolseiros e bolseiras estarán, ademais, exentos do pagamento da matrícula.

O candidato ou candidata debe enviar por correo electrónico á Secretaría dos Cursos a ficha de inscrición, o seu curriculum vitae e unha carta de presentación dun profesor ou profesora de Universidade, así como todos os méritos que considere de interese. Antes do 1º de maio debe enviarse toda a documentación. A preinscrición quedará formalizada cando a persoa solicitante reciba un correo electrónico como xustificante de recepción.

Enrolment:

Unha vez rematado o prazo de inscrición a organización dos cursos outorgará as bolsas. Comunicarase o resultado a cada estudante por correo electrónico e establecerase outro prazo para aceptar ou rexeitar a axuda económica no caso de que sexa concedida. De se produciren renuncias serán os suplentes os beneficiarios das bolsas.

Aquelas persoas que non solicitaron bolsa ou ás que non lles foi concedida tamén recibirán unha notificación por correo electrónico na que se indicará, no caso de seren aceptadas, o prazo que teñen para ingresar, en concepto de reserva de matrícula, a cantidade de 50 euros. O importe total é de 150 euros, e nel están incluídos o dereito a clases, material didáctico, visitas, certificados etc. Os 100 euros restantes terán que ingresarse antes do 30 de xuño.

O importe de 50 euros en concepto de reserva de matrícula (ou ben o resto da matrícula) debe realizarse nas datas indicadas na conta IBAN ES43 2080 0319 6830 40016081, de Novagalicia Banco (Cód. SWIFT: CAGLESMMXXX), Rúa das Orfas, 4, Santiago de Compostela, facendo constar “Cursos de galego” e o nome e apelido(s) do remitente.

Reception

A recepción do alumnado farase o 4 de xullo en horario de 10.00 a 14.00 horas no Instituto da Lingua Galega (USC). Ese día entregaranse individualmente o horario e a programación do curso e resolveranse posibles dúbidas sobre cuestións relacionadas coa organización.

Recepción do alumnado:
Instituto da Lingua Galega (USC)
Praza da Universidade, 4
15782 Santiago de Compostela
GALICIA (España)

Contact

Secretaría dos cursos:
Tfno. 0034 981 207 308
Enderezo electrónico:
cursos@realacademiagalega.org
secretaria@realacademiagalega.org

Dirección dos cursos:
Tfno. 0034 881 812 814
Enderezo electrónico:
ilgcurso@usc.es

Content Index

Cursos de verán de lingua e cultura galegas para estranxeiros 2013

Sección

The ILG

November

Content Index

You are here

Cursos de verán de lingua e cultura galegas para estranxeiros 2013

Sección

Search form

The ILG

November