Cartografías e modelos narrativos da ficción galega contemporánea

Este proxecto ten como obxectivo principal a elaboración dunha cartografía da ficción galega contemporánea que identifique os espazos recorrentes en produtos narrativos actuais. Esta meta apoiase, por un lado, nunha investigación cuantitativa que rexistre e agrupe as referencias xeográficas do corpus de obras e unha máis analítica, consistente en estudar as representacións do espazo, as marcas semióticas e as consecuencias sociais que implica a efectos culturais, turísticos, educativos ou simbólicos.

Vencellado a este primeiro obxectivo do proxecto está o estudo dos modelos narrativos empregados, unha vez que a ficcionalización dos diferentes espazos ou comunidades (cidade, vila, área xeográfica) adoita ter correlacións con determinados xéneros ou formatos. A tal efecto, interesa analizar como se conxugan estas categorías narrativas en termos globais e locais e observar o comportamento dos produtos creativos en termos de público, mercado e institución. Para acadar resultados máis representativos utilizase un corpus intermedial, no que, ademais da literatura se incorpora o cinema, as series televisivas ou a banda deseñada.