Ernesto X. González Seoane

Ernesto Xosé González Seoane (O Barqueiro, 1962) é catedrático do Departamento de Filoloxía Galega.

En 1985 licenciouse en Filoloxía Hispánica pola USC. En 1992 doutorouse nesta mesma Universidade cunha tese sobre o proceso de codificación gráfica e gramatical do galego no século XIX, pola que ademais obtivo o Premio Extraordinario de Doutoramento. Desenvolve a súa actividade docente na Facultade de Filoloxía da USC, da que foi Decano entre 2004 e 2012. Realizou estadías docentes ou investigadoras na City University of New York, na Universidad de Buenos Aires e na Georgetown University.

A súa actividade investigadora desenvólvese arredor de dúas liñas mestras: a lexicografía galega, tanto desde unha perspectiva historiográfica como desde unha dimensión aplicada, e o proceso de estandarización do galego moderno. Entre os seus traballos cabe salientar a edición dos volumes A estandarización do léxico (2003), en colaboración con María Álvarez de la Granja; e A lexicografía galega moderna. Recursos e perspectivas (2009), en colaboración con Antón Santamarina e con Xavier Varela. Ademais, dirixiu a realización do Dicionario de dicionarios do galego medieval (2006) e participa activamente no desenvolvemento do Tesouro do léxico patrimonial galego e portugués.