Ramón Mariño e José António Souto Cabo presentan o seu novo libro

O vindeiro xoves 13 de marzo, ás 19:00 horas, vai ter lugar a presentación do libro De Rui Vasques a Gregório de Lobariñas Feijó. Venturas e desventuras do Libro dos bispos de Yrea e Santiago na libraría Couceiro de Santiago de Compostela. No evento estarán presentes os seus autores e membros do ILG Ramón Mariño Paz e José António Souto Cabo. Ademais, tamén intervirán José Luís Rodríguez (USC) e Miguel García-Fernández (Instituto de Estudos Galegos Padre Sarmiento e colaborador do noso centro).

Esta obra da editorial Sílex xira arredor de tres centros de interese: (i) a demostración de que o códice da Crónica de Santa María de Iria (1467-1468) do Arquivo da Catedral de Santiago constitúe o antecedente da copia seiscentista conservada na Biblioteca Vaticana, autotitulada como Historia de Yria ou Libro dos bispos de Yrea e Santiago; (ii) o estudo lingüístico dese traslado, en canto testemuño singularmente precioso do noso idioma na primeira metade do séc. XVII e (iii) o perfil histórico do seu autor, Gregório de Lobariñas Feijó (ca. 1577-ca. 1637), designadamente naquilo que nos axuda a entender, desde diversos puntos de vista, a orixe e características dese manuscrito.