Francisco A. Cidrás Escáneo

Son profesor titular do Departamento de Filoloxía Galega da Universidade de Santiago de Compostela. Nela me licenciei en Filoloxía Galego-Portuguesa en 1985 e me doutorei en 1991 cunha tese titulada Construcións pasivas en galego. Entre 2002 e 2009 fun coordinador dos programas de doutoramento en Filoloxía Galega da USC primeiro e, posteriormente, do interuniversitario en Lingüística Galega (USC, UdC, UVigo), distinguido con Mención de Calidade. Desde 2009 son director do Departamento de Filoloxía Galega.

Os meus intereses investigadores céntranse fundamentalmente na sintaxe. Téñome ocupado da voz pasiva, das construcións  pronominais e das impersoais. Posteriormente centrei a miña investigación no estudo das relacións funcionais, tanto desde o punto de vista teórico (“On the concept of syntactic function in a functional gramar” FoL 2012) como dos procedementos de marcaxe das relacións sintácticas en galego: concordancia verbal, de clíticos e marcado preposicional. Tamén me interesa o estudo da sintaxe desde a perspectiva da variación e o cambio lingüístico, así como o seu tratamento na historiografía gramatical.