Henrique Monteagudo, novo presidente da RAG
Data:
Viernes, Abril 4, 2025 - 21:45
Imaxe:
O pleno da Real Academia Galega, reunido na tarde de hoxe en sesión extraordinaria, apoiou a candidatura do investigador do ILG Henrique Monteagudo á presidencia. O décimo cuarto presidente da RAG estará acompañado na comisión executiva por Ana Boullón Agrelo como secretaria; María López-Sández como tesoureira, ambas as dúas investigadoras do noso centro; María Dolores Sánchez Palomino, colaboradora do Instituto, como arquiveira bibliotecaria, e o historiador Lourenzo Fernández Prieto como vicesecretario.
Monteagudo puxo o acento na defensa da lingua galega e comprometeuse a procurar novas formas de exercer esta responsabilidade, “cada vez máis imperiosa” por mor das medidas restritivas desenvolvidas na súa contra, advertiu. Sinalou ademais a oportunidade que supón seguir a fortalecer a difusión e a accesibilidade dos recursos de consulta lingüística da RAG, aproveitando as oportunidades que brindan as novas tecnoloxías para superar a fenda entre o galego e o castelán.
O novo presidente tamén indicou que a institución seguirá a apostar polo incremento da presenza feminina no seu seo. Actualmente intégrana 9 mulleres fronte a 19 homes.
Ligazóns:
