Pablo García Martínez

Pablo García Martínez é investigador posdoutoral Ramón y Cajal no Instituto da Lingua Galega e na Facultade de Filoloxía da Universidade de Santiago de Compostela. Antes, completou o seu doutoramento (Ph.D.) na City University of New York (CUNY, 2018), así como un posdoutoramento Humboldt, con residencia no Institut für Romanistik da Friedrich-Alexander (FAU, 2020-2021). Realiza a súa investigación a través dun enfoque sociohistórico para a análise dos procesos culturais que aplica, sobre todo, ao estudo dos exilios provocados pola Guerra Civil española, así como ao das literaturas e culturas ibéricas do século XX, con crecente concentración no eido dos estudos galegos.

No 2021 publicou na Editorial CSIC a monografía Un largo puente de papel. Cultura impresa y humanismo antifascista en el exilio de Luís Seoane, así como unha edición anotada do teatro deste mesmo autor, publicada por Ediciones Renacimiento. En 2023 publicarase, na casa hispanoxermana Iberoamericana, a súa monografía Escrituras contra el desalojo de la historia. Exiliadxs catalanxs, gallegxs y vascxs en Argentina y México. Publicou a súa investigación en revistas como Madrygal. Revista de Estudos Galegos (Universidade Complutense de Madrid), o Journal of Spanish Cultural Studies (Taylor & Francis), a Revista Hispánica Moderna (University of Pennsylvania Press) ou o Bulletin of Hispanic Studies (Liverpool University Press).

Comisionou as exposicións Modernidades diverxentes. Seoane, Ver y Estimar (Fundación Luis Seoane, A Coruña, 2021) e Materiales Seoane. En la encrucijada de lo moderno (Museo Larreta, Buenos Aires, 2022, comisionado con Silvia Dolinko). Presentou a súa investigación en congresos, reunións de traballo ou conferencias por convite celebrados en Columbia University, Harvard University, Johns Hopkins University, University of Pittsburgh, Oxford University, University College Cork, Friedrich-Alexander Universität, El Colegio de España (París) ou o Centro Superior de Investigaciones Científicas (CSIC).

*Fotografía: Alba Viñas