O curso está dirixido a investigadores e a alumnado do ámbito dos estudos lingüísticos que estean a realizar traballos de fin de grao, traballos de fin de máster ou a tese e teñan interese en realizar análises estatísticas dos seus datos.
Trátase dun curso de iniciación que non require coñecementos profundos de análise cuantitativa de datos nin de calquera outro método estatístico. Polo tanto, resultará de interese para todo aquel que teña inquietudes na análise e na interpretación de datos lingüísticos mediante métodos estatísticos. Ademais, é especialmente interesante para lembrar e actualizar os coñecementos de estatística básica.
Os distintos métodos estatísticos presentaranse con exemplos prácticos e reais da área da lingüística (fonética, lingüística de corpus, sociolingüística, onomástica etc.).
O alumnado que asista a este curso será capaz de interpretar e aplicar as técnicas básicas de estatística descritiva e inferencial que se empregan habitualmente no ámbito da lingüística. Ademais, adquirirá os rudimentos básicos para utilizar de xeito efectivo o software estatístico R.
O curso desenvolverase na Facultade de Filoloxía (Universidade Santiago de Compostela).
O curso será de balde. Entregaráselles un certificado de asistencia a todos os inscritos (previamente seleccionados) que asistan.
