Eva María Domínguez Noya

Son investigadora asociada adscrita á Universidade de Santiago de Compostela, na que me doutorei en 2013 coa tese titulada Etiquetaxe e desambiguación automáticas en galego: o sistema Xiada. Licenciada nesta universidade primeiro en Filoloxía Hispánica na sección de Hispánicas (1993) e posteriormente na sección de Galego-Portugués (1996), a miña investigación céntrase fundamentalmente na área da lingüística computacional para o galego e o castelán. Respecto do primeiro, coordino a parte lingüística do Corpus de Referencia do Galego Actual (CORGA), e son a responsable dos recursos lingüísticos que emprega o etiquetador XIADA para a etiquetaxe morfosintáctica automática do corpus. A miña experiencia na construción de corpus, na súa codificación e anotación e mailo deseño de ferramentas para a recuperación de información leváronme a colaborar, xa en español, no proxecto DRASAE (Desenvolvemento de recursos para a análise sintáctica automática do español) e máis recentemente en ESLORA, o corpus para o estudo do español oral.

En relación cos múltiples problemas que causa a anotación de corpus, afondei na clasificación categorial e comportamento de certos elementos problemáticos como poden se-las partículas exceptivas ou algunhas supostas locucións. Os meus intereses na actualidade diríxense, por unha banda, a mellorar a anotación morfosintáctica de corpus mediante a construción de regras lingüísticas e a lematización automática, tanto para galego como para español e, doutra, a aproximarme á análise sintáctica do rexistro oral, polo momento á man, pero pensando en levalo a cabo dun xeito semiautomático no futuro.