Artigo de Estela Fidalgo sobre o piropo en 'Galicia 21'

A investigadora do Instituto da Lingua Galega Estela Fidalgo Garra vén de publicar o artigo "O papel (des)cortés do humor na produción do piropo galego" na revista Galicia 21: Journal of Contemporary Galician Studies. O obxectivo principal do traballo consiste en afondar na análise do papel que os indicadores humorísticos xogan na enunciación do piropo na Galiza contemporánea. Para iso, Fidalgo recolleu datos sobre a produción de piropos en diferentes contextos comunicativos e analízaos atendendo a diferentes variables sociais (idade e xénero). O obxectivo é identificar diferenzas xeracionais no comportamento das persoas á hora de empregar a estratexia pseudoencuberta e os elementos humorísticos asociados a esta. Estes resultados contribúen a botar luz sobre a evolución desta práctica no contexto galego.

Galicia 21 é unha revista en liña de libre acceso especializada en estudos galegos que promove o estudo de eidos e cuestións críticas que ata o de agora non recibiron atención sistemática nos estudos culturais galegos, como, por exemplo, as artes visuais e dixitais, os estudos de medios e comunicación, o cinema, a cultura de masas, teoría ou historia cultural. Ao tempo, a revista quere contribuír a profundizar a nivel teórico e crítico sobre conceptos clave para os estudos culturais galegos como a nación, a identidade, o poder, o xénero ou o espazo.