Ramón Mariño e Damián Suárez editan o arquivo dixital 'Papés d’e emprenta condenada'
O Consello da Cultura Galega (CCG) pon á disposición do público a ferramenta dixital Papés d’e emprenta condenada. A escrita galega entre 1797 e 1846, a cal permite explorar e analizar a produción escrita en lingua galega durante un período clave da súa historia.
A presentación desta iniciativa tivo lugar o pasado 12 de decembro na sede do CCG e contou coa participación da súa presidenta, Rosario Álvarez; do editor dos textos e investigador do Instituto da Lingua Galega da Universidade de Santiago de Compostela, Ramón Mariño; e do coordinador da unidade de divulgación e contidos dixitais do CCG, Manuel Gago. No desenvolvemento da aplicación participou tamén o investigador Damián Suárez Vázquez, cuxo traballo resultou fundamental para o rescate e o estudo de novas pezas da tradición escrita galega premoderna.
O proxecto persegue obxectivos tanto filolóxicos coma históricos. Entre eles, destaca a fixación e edición dun corpus disperso de textos galegos, a análise da lingua nun momento de transición marcado pola variación dialectal, a documentación do papel do galego na vida política, social e xornalística da época, así como a posta en valor da contribución destes textos á emerxencia da opinión pública moderna.
A ferramenta ofrece un acceso aberto a materiais fundamentais para o estudo da historia da lingua galega e constitúe un recurso de grande interese tanto para a comunidade investigadora coma para o público xeral interesado no patrimonio lingüístico e cultural de Galicia.
