O galego no seu contexto xeolingüítico: os romances noroccidentais no ALPI

Este proxecto ten como obxectivo analizar o galego desde unha perspectiva comparativa, integrándoo no seu marco xeolingüístico e explorando as súas relacións coas linguas circundantes. Ata agora, o estudo do galego priorizou unha visión interna, con pouca atención á súa interacción con outras variedades, salvo o contacto co castelán. Isto podería deberse á necesidade inicial de describir unha lingua pouco coñecida na romanística e á busca de explicacións internas para certos trazos que o diferencian do portugués ou o aproximan ao castelán. Porén, un enfoque emerxente nos estudos iberorrománicos considera os trazos compartidos entre variedades dialectais, apoiándose en desenvolvementos da lingüística de contacto. Este proxecto utiliza datos inéditos do Atlas Lingüístico da Península Ibérica (ALPI) para estudar os trazos preservados ou adquiridos polo galego, identificando as súas converxencias lingüísticas e culturais, e comprendendo mellor a súa evolución histórica dende o latín ata o galego actual.